Imyigaragambyo Nticogora muri Aljeriya

Muri Algeria, abantu batagira ingano biriwe mu mihanda na none basaba ko “ingoma” iri ku butegetsi ivaho. Bari bitwaje, nk’uko bisanzwe, amabendera y’igihugu menshi cyane, basakuza ngo “Bouteflika genda. Jyana na Gaïd Salah. FLN mvira aha.”

Ubu bibaye ibyumeru bitandatu bikurikirana rubanda bigabiza imihanda basaba ko Perezida Abdelaziz Bouteflika yegura. None bongeyeho agomba kujyana n’umugaba w’ingabo z’igihugu, Général Ahmed Gaïd Salah, n’ishyaka FLN, riri ku butegetsi kuva Algeria ikibona ubwigenge mu 1962.

Général Gaïd Salah amaze imyaka 15 ari umugaba w’igisilikali. Abifatanije kandi kuva mu 2013 no kuba igisonga cya minisitiri w’ingabo, perezida Bouteflika ubwe.

Abaturage baririmbaga kandi inyikirizo y’indirimbo yitwa “La liberté” ni ukuvuga ubwigenge, yahimbiwe iyi myigaragambyo n’umwe mu bahanzi uzwi cyane muri Algeria, bakayisimburanya n’indirimbo yubahiriza igihugu.

Polisi y’igihugu yagerageje kubasanza ikoresheje kubamishamo amazi asohokana ingufu nyinshi mu matiyo. Ariko byabaye iby’ubusa.

Translate »
Skip to toolbar