Amakenga ku Nama Hagati ya ba Perezida Kim na Trump

Ba Perezida Kim Jong Un wa Koreya ya Ruguru ba Donald Trump wa Leta zunze ubumwe z’Amerika
 Igihugu cya Koreya ya ruguru cahagaritse kuri uyu wa gatatu ibiganiro byo ku rwego rwo hejuru na Koreya y’epfo kandi kivuga ko Leta zunze ubumwe z’Amerika ikwiye kugenda buhoro ku mubonano hagati ya Perezida Kim Jong Un na Donald Trump bivanye n’imyimenyerezo ya gisirikare ya Amerika na Koreya y’epfo.

Itororokanirizo ry’amakuru rya Koreya ya ruguru ryatangaje ko iyo myimenyerezo igamije gutera icyo gihugu kandi ni agasomborotso mugihe hari utwigoro two kunagura imigenderanire hagati ya Koreya zompi.

Ibiro bya Perezida, White House nta byinshi vyashikirije kiretse kuvuga ko bizabandanya bikorana n’ibihugu bicuditse.

Ubushikiranganji bwo kwivuna abansi muri Amerika buvuga ko iyo myimenyerezo isanzwe yama iba buri mwaka kandi imaze imyaka itari mike.

Amerika, ibicishije ku muvugizi w’ubushikiranganji bw’imigenderanire, Heather Nauert ivuga ko Perezida Kim ubwiwe yavuze ko atahura iyo myimenyerezo kandi azi akamaro kayo kuri Leta zunze ubumwe z’Amerika. Heather yemeza ko gushika ubu Amerika yiteguriye inama na Perezida Kim.

Ariko abandi bakoranye na Koreya ya ruguru imyaka n’imyaka bavuga ko hariho abagomba kuburizamwo uyo mubonano bibaza ko bitumbereye gukura ubutegetsi bw’icami bwa Perezida Kim.

Translate »
Skip to toolbar